Revelation of John 17
Kumai kava'mo hu'niya a kanoe'mo ava gemo hu'niya gemae
1Mago enisole vekamo seveni'a yuvapamo ali'naya enisole vayapati vekamo'a nagaefe'mo, Eno, Goti'a kumai a kanomo alopa ani'mo agotofule'mo fai mai'niya a kanomo kayo'mo amisiya kava'mo ali'na kave liguve. 2Ma mopafi'mo ala kini vaya'mogimo agae'e'mo kumai kava'mo hu'nae. Vaya'mogi ani'mo ne'ne'apae'mo negi nagi nehaya kava hu'a muki ma mopafi vaya'mogimo ani a kano'e'mo kumai kava'mo hute'a negi nagi kava hu'a mai'nae, huno naha pai'niye.3Nagaemo Goti Auneme'afi'mo mai'ne'na naune kava'mo hu'na mai'nogeno'ae'mo ani enisole vekamo'a ka'me kotega navalelino u'niye. Agovana mago a kanomo'a haesa afela afule'mo fai mai'niye. Afela afumo agufale'mo asole agimo Goti agi'agana agufa agi'amo Goti agi'ale'mo huno faipa huno ate'niya agi'amo hane'niye. Afela afumo'mo seveni'a agenopamo hane'nigeno naya lole'a lokiya'amo hane'niye. 4Ani a kanomo'a lusi monileti'mo miya nefaiya agufa kukenamo oko kukena'e haesa kukena'e'mo vaili'nigeno goli konali yanagi lusi monileti'mo miya nefaiya konali yafanagi alagepa sesugi huno agufale'mo vaino ali'nigeno agufaleti'mo alave alave'age'mo hu'niye. Agaemo goli kapumo ayapi'mo ali'nigeno ani kapufi'mo alagi hosu faipa ya'e kumai kava'mo nehaya kava'a'e'mo havai te'niye. 5Hanile'mo hane'niya agimo aepa'amo fala ki agi'amo avo'mo kae male'niyana
Alopa Mamiloni'ae. Kumai a'ne anaga'ai ita'apimo'mo mai'niye. Hu'a faipa hu'a ne'ataya vaya'ai ita'apimo'mo mai'niye,
huno hu'niye. 6Ani a kanomo'mo asole apaote vaya'mo nefaliya kava'mo aepa a kanomo mai'neno'ae'mo Yesu agi'alefe'mo fali'naya vaya'ai kola'apimo neteno negi nagi huno mai'nige'na age'nove. Agete'nae'mo lusi kava hu'na nahau ai'nove.
7Nahau ai'nogeno'ae'mo enisole vekamo'a, na kava higeka kahau ne'aine, huno nafi ge'niye. Nagaemo a kanomo'mo fala ki'niya aepa'a'e afela afule'mo fai mai'nigeno afela afumo'mo seveni'a agenopamo hane'nigeno naya lole'a lokiya'amo hane'niya afela afumo'mo fala ki'niya aepa'a'e'mo ali'na kave liguve. 8Age'nana afela afumo hogoteno mai'niyana hemenimo o'mai'niyanageno henaga'amo ive kelifati'mo afole aitesigeno alagi alino ago'ya lagauno atalegaiye. Ma mopafi vaya'mo Goti'a ma mopamo alo osu'niya afina'mo afa'a maisaya ya'mo ali'nisaya vaya'ai apaki'apimo hane'niya mukufi'mo avo'mo kaeno o'male'nisiya vaya'mogimo afela afumo agete'apae'mo hapau aigae. Hogoteno mai'niyana hemenimo o'mai'niyanageno henaga'amo halate afole aigiya'mofe'mo hapau aigae.
9Alagepa hu'a afisayafe'mo alagepa hu'a apakesamo afisaya agufa apakesamo haneno. Seveni'a agenopamo hane'niya kava huno a kanomo'mo seveni'a avele'mo itopale'mo mai'niya avemo hane'niye. Ani kava huno seveni'a agenopamo hane'niya kava hu'a seveni'a kini vaya'mo mai'nae. 10Faefu'a kini vaya'mo ago hano hutageno magoke kini vekamo mai'nigeno mago alu kini vekamo afole o'ai'niye. Afole aiteno'ae'mo aise afina'mo maigiye. 11Afela afumo hogoteno mai'niyanageno hemenimo o'mai'nigeno napa eiti kini vekamo mai'niye. Agaemo seveni'a kini vayapati vekamo mai'niyanageno alino ago'ya lagauno atalegaiye. 12Age'nana afela afumo lokiya'amo naya lole'a lokiya'amo hane'niya kava hu'a naya lole'a kini vaya'mo mai'nae. Hemenimo yagai'a no'apatayanageno himamu'apimo alino apamisige'apae'mo afela afu'e'mo magokepi lokae'a magoke aovafi'mo aise afina'mo yagai'a apategae. 13Apakaemo magoke apaipa apakesamo alite'a afela afumo himamu'apimo amite'a aiyafi'mo maigae. 14Apakaemo aikeli sipisipi'e'mo kame hugayana sipisipimo'a ago huno aeno apakasegaiye. Agaemo ala kava vaya'ai ala kava ne'apimo mai'neno kini vaya'aite'mo yagaino ne'apateya kini vekamo mai'niya'mofe'mo huno aeno apakasegaiye. Lekana paino apate'neno keya aeno ge hu'niyanage'a o'atale'a akame nehaya vaya'mogimo agae'e'mo magokepi lokae'a maigae, huno hu'niye.
15Enisole vekamo'a huno'ae'mo, Kumai a kanomo'a monimo ne'aliya a kanomo ani'mo agotofule'mo mai'niya ani'mo hane'niya kava hu'a vaya'mo mai'nae. Ani vaya'mo muki alu apakufa'e alu apakufa'e vayanagi muki asole vayanagi muki alu kotega alu kotegamo mai'naya vayanagi muki alu apake alu apakemo ne'aiya vaya'mogi hu'a mai'nae. 16Afela afu'e naya lole'a lokiya'amo hane'niya ya'e'mo kini vaya'mo mai'naya vaya'e'mo kumai kava'mo huteno monimo ne'aliya a kanoe'mo alagi ohapaugiye. Apakaemo kukena'amo ali'a asagi'a atalesageno agufalaga'age'mo mai'nisige'apae'mo ame he'a nete'a atafi'mo ali'a kae'a asagali'a atalegae. 17Na kava hige'apaene. Goti'a ani kava'mo hugae, huno hu male'niya kava'mo hisayafe'mo ani agufa apaipamo alino apami'nige'a magoke apaipamo alite'a yagaisaya himamu'apimo ali'a afela afumo amite'a aiyafi'mo maime maime ne'ageno'ae'mo Goti ge'amo afole ai'niye. 18Age'nana a kanomo mai'niya kava huno alopa taonimo'mo yagai'a ne'apataya kini vaya'aite'mo yagaino ne'apateya taonimo Mamiloni taonimo hane'niye, huno naha pai'niye.
Copyright information for
KYG